મોજ-એ-દરિયા | “મોજ v/s આનંદ”

“મોજ v/s આનંદ”

"મજા ક્યાંથી લેવી એ પણ એક હેલ્થી સ્કિલ છે..!"

ન્યૂટનનો પહેલો નિયમ કહે છે કે “જ્યાં સુધી વસ્તુ પર બાહ્ય બળ ના લાગે ત્યાં સુધી વસ્તુ જે સ્થિતિમાં ( સ્થિર હોય તો સ્થિર અને ગતિમાન હોય તો ગતિમાન) રહેશે...” આ વસ્તુ પરનો નિયમ માણસ, મન, વિચારસરણી અને આપણા જીવન પર પણ એટલો જ લાગુ પડે છે.. આપણે આપણું જીવન જીવીએ જ છીએ પણ આપણી વિચારધારા અને આપણાં દૃષ્ટિકોણ થી.. પણ જીવનમાં અમુક બનાવો બને અથવા કોઈ સારું પુસ્તક મળે કે કોઈ જ્ઞાની મળે તો ચોક્કસ આ વિચારધારા અને દૃષ્ટિકોણ, ને એકંદરે જીવન બદલાય છે. ટૂંકમાં, આપણે આપણાં જીવન, આપણી દિશા, વિચારો, કાર્ય ને “AS A THIRD PERSON” જોવું પડે, નહીં તો વર્ષો જીવ્યા પછી છેલ્લે જ્ઞાન થાય ને “હવે જીવનમાં વર્ષો બચ્યા જ કેટલા?” અથવા “अब पछताए होत क्या जब चिड़िया चुग गई खेत” નો ભાવ જાગે..

આજનો આ આર્ટીકલ પણ આવો જ “એક વિચાર” છે.. બને એટલા સરળ શબ્દો માં લખેલ છે છતાં જરૂર પડે 2 વાર વાંચજો. મારો દાવો છે કે આ તમારા જીવનમાં અને અભિગમ માં ચોક્કસ બદલાવ આવશે..

આ આર્ટીકલ 3 ભાગ માં વિભાજિત છે.

પાર્ટ 1: “મોજ-એ-દરિયા”

“શું ચાલે?”

“બસ મોજે દરિયા...”

મજા.. મોજ, હરખ, હર્ષ, ખુશી, ગમ્મત, લહેર, આનંદ, મશ્કરી...

મજા કરવી, એ જીવની સહજ પ્રકૃતિ છે... આપણે પણ જીવનમાં જીવન વ્યાપારના આવશ્યક કામ તો કરીએ છીએ સાથે ખુશ રહેવાનો પ્રયત્ન પણ પૂરો કરતાં જ હોઈએ છીએ. કારણ કે જીવન મજા યુક્ત પસાર કરવું એ આપણા આ જન્મારાના ‘એસેન્સિયલ ગોલ’ માનો એક છે.. એટલે સૌ કોઈ જીવિત આ જીવનલક્ષ્યાંક જાણતા-અજાણતા, સદિશ-દિશાહીન, સસ્તી-મોંઘી, સાત્વિક-રાજસિક રીતે આની પૂર્તિ હેતુ તત્પર તો રહે જ છે. આ તત્પરતામાં આપણે સાથે સ્પેશિયલ એકસ્ટ્રા મજા પણ કરી લેતા હોઈએ. કોઈ વાર કામ ના સ્ટ્રેસમાંથી ફ્રી થવા, કોઈ વાર રજા આવતી હોય, કોઈ વાર પરિવાર માટે, કોઈ વાર આદતના કારણે, કોઈ વાર કામ પછી ના રીવાર્ડ આપવા આપણે જીવન માં કોઈ ને કોઈ રીતે મોજ લેવાનું ચાલુ જ હોય..

તો ચાલો થોડી મોજ ની મજા માણીએ...

7 વર્ષનું બાળક, જેવા મમ્મી પપ્પા એને ઘરે એકલા મૂકી બહાર ગયા, એવું જ બોનવિટાનો ડબ્બો લઈ, કાર્ટૂન જોતા જોતા ખાવાની ભાઈ કેવી મજા...

2 બહેનપણીઓ એ સ્કુટી માંથી વળાંક લીધો ને સામે પાણીપુરીની લારી.. એક્સ્ટ્રા તીખી પાણીપુરી ખાતી જાય ને હાથથી તીખાશના ધુમાડા ઉડાડતી જાય.. છેલ્લે પડિયામાં જે પાણી રહ્યું એની પણ ખાટી તીખી અલગ મજા...

ઉનાળાની મસ્ત ગરમી માં ઠંડો ઠંડો આઇસક્રીમ કે ગોળો.. આ હા, અઠવાડિયા માં 2 વાર તો આ મોજ જોઈએ જ..

લેટ નાઈટ પાર્ટી માટે.. ભાઈએ DEO ના ફુવારા ઉડાવ્યા, સુગંધી મોજ ને “પાલ્ટી” રેડી...

અબજોપતિ ખાનદાનમાં જન્મ, જેગુઆર ગાડી ને ફ્રેન્ડઝ-ફ્રેન્ડીઝ નું ગ્રુપ. રાત્રે શહેર સુવે પછી 160-180 ની સ્પીડે શહેરની સડકો ને જ હાઇવે બનાવી ઝડપની કેવી મજા?!! (એસ.ટી. ની ટેગલાઇન યાદ આવી ગઈ!) આમને જોઈ ને એમ જ થાય સાલું કેટલા જન્મ ના પુણ્ય ભેગા થાય ત્યારે આટલી મોજ વાળું જીવન મળે.!

આવા જ બાઇક ગેંગ ના ભૂંગળા ના ભડાકા !, આપણે ઘરમાં બેઠા હોય તોય રૂંવાડા ઊભા થઈ જાય!

નવું પિકચર, ફ્રેન્ડ્સ, પોપકોર્ન, કોક, લિપસ્ટિક ના પાઉટ, આઈ ફોનની સેલ્ફી, આફ્ટર મૂવી પિઝ્ઝા, fun unlimited...

આપણા ઉનાળાની ગરમી... કામ પરથી આવી.. જમીને.. AC 16 પર... સીમલા મનાલી જવાના પૈસા કોણ ખર્ચે, સોલર નાખ્યું જ છે!! રૂમમાં જ સીમલા મનાલી બનાવીને ઠંડો અનુભવ..

રાત્રે 10 વાગે સૂતા પણ ઊંઘ ના આવી એટલે

મોબાઈલ લીધો ને મિત્રોનેય ઓનલાઈન બોલાવ્યા. પ્રાતઃકાળ સુધી મિત્રમંડળીનો “પબ જી” સત્સંગ.. આ હા હા, મિત્રો વિનાનું જીવન નકામું ભાઈ! આવી મિત્ર સંપતિ મળી ના હોત તો આપણું જીવન કેવું હોંત? આપણે કયા હોત? ?

મમ્મી બેબીને બોલાવી બોલાવી ને થાકી ગયા પણ બેન સાંભળે શેના?

કાનમાં ફૂલ વોલ્યુમાં હેડ ફોનમાં મ્યુઝિકની મોજ જો ચાલુ છે...

બીપી ડાયાબિટીસ યુક્ત સિનિયર સીટીજન... બીપી ડાયાબિટીસ યુક્ત પત્ની બહાર ગઈ હોવાથી એકલા ને પછી ફ્રીજમાં પડેલી દોહિત્રીની ચોકલેટ ખાવાની કેવી મીઠી મજા...

કોઈ પણ પ્રકારના જીવન ટાર્ગેટ કે પૂર્વનિર્ધારિત કામ વગરની

હોસ્ટેલની હાઇલાઈફ, શિયાળાની સવાર, ચાની ચૂસકી ને સિગારેટના કસ.. આહાહા

અરે પેલું કેમ ભુલાઈ ગયું?

આપણો પ્રથમ હરોળનો રાષ્ટ્રીય અને સાંસ્કૃતિક તહેવાર, “ 31^st ”.

जहाँ चार यार, जहाँ चार यार मिल जायें, वहीं रात हो गुलज़ार | जहाँ चार यार ! પહેલી જાન્યુઆરી એ સવારે માથું પકડેલા કે લીંબુ ની શોધ કરતાં સંત-સજ્જન પ્રકૃતિ ની નર માદા મહાત્માઓ, આગલી રાત્રે જીવન-મૃત્યુ/પ્રેમ-નફરત/સફળતા/સંબંધો વેગેરેનું જે અમૃતબિંદુ તુલ્યજ્ઞાન પીરસતા હોય.. “નશા શરાબ મેં હોતા તો નાચતી બોટલ”, “તું મારો ભાઈ છે”, “જિંદગીની આ જ વાસ્તવિકતા છે”, “તું એમ ન સમજતો કે પીને બોલું છું.”... આ હા હા... દંડવત પ્રણામ... “મોજ-એ-બ્રહ્માંડ”.!!! ના ના ધરતી પર પાછા ફરો, નહીં તો આર્ટીકલ 4 ભાગ નો થશે.!

મજાની આટલી જ વાત કરી છે તો સાથે આ મજાની પરાકાષ્ઠા ના વર્ણનની પણ મજા માણી લો..

"પાન ના ગલે ઊભેલો એક મોજીલો... લીગલી છુટ છે એવા 50 માઇક્રોનના પ્લાસ્ટિક માં એક મસાલો... જેમાં, પિતા पुगफल (સોપારી) અને માતા ताम्रपर्णी (તમાકુ) ક્રમાંક पंचस्त्रिंशदधिकशतं (૧૩૫) માં सुधा जल(ચૂનો) જરૂર પ્રમાણે घन/तनु शीत/पीत (જાડો-પાતળો, ધોળો-પીળો) નાખી પ્રારબ્ધ અને પુરુષાર્થ થી હથેળી માં ઉગાડેલી રેખાઓ અડધી ભુસાઈ જાય એ રીતે જે મંથન થતું હોય આ હા હા હા, સાક્ષાત પ્રકૃતિ ને પુરુષનું મિલન થતું હોય એવું લાગે.. नमस्कार:।

અને મોજીલો મંથન થી પ્રાપ્ય અમૃત મસાલાને અંગુષ્ઠ, તર્જની અને મધ્યમાં ની મદદથી ગાલ ના એકાંતર પાશ્વમાં મૂકીને જે દરિયા જેવી અમાપ મજા એ અનુભવે છે.. આ હા હા હા , અવર્ણનીય..

ને પછી મોજીલો સામે વાળાના કર્ણ સુધી તો પહોંચે પણ ઇન્દ્રિયો સમજી ના શકે એવા અસ્પષ્ટ ઉચ્ચારણ અને વચ્ચે વચ્ચે "અતિ શુભ" શબ્દો (ગાળો) સાથે જે ફેંકતો હોય... આ હા હા. પણ એના હાવભાવ થી ખબર પડી જાય એ દિલ્લીના નેતાઓને રાજકારણ શિખવાડે છે કે કોહલીને બેટિંગ શિખવાડે છે કે પોતાના લંગોટિયા અમેરિકાના જોઈ બાઇડન ની વાત કરે છે..

પણ આ શું, વાતો માં જ મસાલા યુક્ત લાલાસ્ત્રાવ મુખના બાંધ તોડી ઓષ્ટદ્વાર(હોઠ) સુધી આવી જાય છે.. ને પછી મોજીલા દ્વારા આજુ બાજુ જોઈને ટાર્ગેટ પ્લેસ નક્કી કરે છે અને ટાર્ગેટ પ્લેસનું લોકેશન, પગ થી ટાર્ગેટ પ્લેસ નું અંતર, મુખ થી ટાર્ગેટ પ્લેસનો એંગલ, હવાની દિશા, હવાની ગતિ જોઈને પિચકારી નો વેગ, પ્રવેગ, દિશા, માત્રા નક્કી કરી મગજની 7 અને 12 નંબરની નસ(ક્રેનિયલ નર્વ: 7-ફેસિયલ નર્વ, 12- હાયપો ગ્લોસલ નર્વ) વડે જડબા, મુખ ના સ્નાયુ ને જીભ ને આદેશ આપી ટાર્ગેટ oriented જે પિચકારી છોડવામાં આવે છે, વાહ. . . અસંભવ ,અદભુત,અદ્વિતીય, રમણીય... पुन: नमस्कार:।